Rev 15 | TwiNAK | STEP | Mihuu ade foforo bi a ɛso na ɛyɛ nwonwa wɔ soro. Na wɔyɛ abɔfo baason a wokita ɔhaw ason a ɛno ne ɔhaw a etwa to efisɛ, ɛno na ɛkyerɛ Onyankopɔn abufuw a etwa to.

Revelation of John 15

Ɔyaredɔm

1 Mihuu ade foforo bi a ɛso na ɛyɛ nwonwa wɔ soro. Na wɔyɛ abɔfo baason a wokita ɔhaw ason a ɛno ne ɔhaw a etwa to efisɛ, ɛno na ɛkyerɛ Onyankopɔn abufuw a etwa to.

2 Afei mihuu biribi te sɛ ahwehwɛ po a wɔde ogya afra. Afei mihuu wɔn a wɔadi aboa no ne ne sɛso ohoni ne nea wɔde nsɛnkyerɛnne na ɛbɔ ne din no so nkonim no. Na wogyinagyina ahwehwɛ po no ho a wokitakita asanku a Onyankopɔn de ama wɔn no. 3 Na wɔreto Onyankopɔn akoa Mose dwom ne Oguammaa no dwom se,

“Awurade, Otumfoɔ Nyankopɔn,
wo nnwuma yɛ akɛse na ɛyɛ nwonwa,
Amansanhene.
Wʼakwan teɛ na ɛyɛ nokware.
4 Hena na onsuro wo, Awurade?
Hena na ɔrenka wo kɛseyɛ?
Wo nko na woyɛ kronkron.
Aman nyinaa bɛba abɛsom wɔ wʼanim, efisɛ, obiara ahu wo treneedwuma no.”

5 Afei mihui sɛ asɔredan a ɛwɔ soro hɔ no Kronkron mu Kronkron no abue a Onyankopɔn ntamadan si mu. 6 Abɔfo baason a wɔmaa wɔn tumi sɛ wɔmfa ɔhaw ason mmra no pue fii asɔredan no mu a wɔhyehyɛ ntade fitafitaa a wɔbobɔ sikakɔkɔɔ abɔso wɔ wɔn koko so. 7 Afei ateasefo baanan no mu baako maa abɔfo baason no sikakɔkɔɔ nkuruwa ason a, Onyankopɔn a ɔte ase daa daa no abufuw ahyɛ no ma. 8 Wusiw a efi Onyankopɔn anuonyam ne ne tumi mu no hyɛɛ asɔredan no ma. Na obiara antumi ankɔ asɔredan no mu kosii sɛ ɔhaw ason a abɔfo baason no de bae no to twae.